ហ្គាណា៖ អ្នកគាំទ្ររាប់រយនាក់បាននាំគ្នាដើរដង្ហែរតាមផ្លូវនារដ្ឋធានី Accra របស់ប្រទេសហ្គាណាកាលពីថ្ងៃពុធ ដោយទាមទារឱ្យមានការរៀបចំកំណែទម្រង់ឱ្យកាន់តែប្រសើរឡើងវិញទៅលើសហព័ន្ធកីឡាបាល់ទាត់ បន្ទាប់ពីក្រុមជម្រើសជាតិបានធ្លាក់ចេញពីពានរង្វាន់ Africa Cup of Nations ត្រឹមវគ្គចែកពូល។

អ្នកគាំទ្ររាប់រយនាក់ដែលគេឃើញពាក់អាវពណ៌ខ្មៅ និងពណ៌ក្រហមដែលសរសេរថា៖ "ជួយសង្គ្រោះបាល់ទាត់ហ្គាណា (Save Ghana football)" និងលើកបដាតវ៉ាផ្សេងៗ បាននាំគ្នាដើរប្រមូលផ្តុំតវ៉ាទៅលើដងផ្លូវសំខាន់ៗនានា ក្នុងគោលបំណងសំដែងការខកចិត្តក្រោយពីក្រុមបាល់ទាត់រហស្សនាម "ផ្កាយខ្មៅ" របស់ពួកគេបង្ហាញខ្លួនមិនបានល្អសោះក្នុងពានរង្វាន់់ធំៗផ្សេងៗមួយរយៈចុងក្រោយ។ 

ហ្គាណាគឺជាម្ចាស់ពាន AFCON បួនសម័យកាល ប៉ុន្តែបានខកខានគ្រងជើងឯកតាំងពីឆ្នាំ១៩៨២ មកម្ល៉េះ ព្រមទាំងធ្លាប់បានបង្ហាញខ្លួននៅ World Cup ចំនួន ៤ដង និងឈានឡើងវគ្គ ៨ក្រុមចុងក្រោយម្តងផងដែរកាលពីឆ្នាំ២០១០។ សមាគមបាល់ទាត់ហ្គាណា (GFA) ទើបតែបានប្រកាសបណ្តេញលោក Chris Hughton ចេញពីតំណែងគ្រូបង្វឹក ពោលគឺក្រោយពីហ្គាណាបានបញ្ចប់លេខ ៣ ក្នុងពូល B មានត្រឹម ២ពិន្ទុប៉ុណ្ណោះក្រោយលេងបាន ៣ប្រកួត។ 

ក្រុមអ្នកតវ៉ាដែលកំពុងដង្ហែរញ្ញត្តិដាក់ជូនសភាជាតិនិយាយថា៖ "បាល់ទាត់ហ្គាណាសព្វថ្ងៃនេះកំពុងប្រឈមមុខនឹងភាពខ្មៅងងឹតបំផុតនៅក្នុងប្រវត្តិសាស្ត្ររបស់ខ្លួនដែលមិនធ្លាប់មានពីមុនមក ដែលកំពុងនាំមកនូវភាពអាម៉ាសមកលើនិមិត្តសញ្ញា ​និងទង់ជាតិដែលធ្លាប់ធ្វើឱ្យប្រជាជនទាំងអស់មានមោទនភាពកន្លងមក"។ ពួកគេបានទាមទារឱ្យប្រធានាធិបតី Nana Akufo-Addo បើកការស៊ើបអង្កេតលើការចូលរួមក្នុងព្រឹត្តិការណ៍ FIFA World Cup ឆ្នាំ២០២២ និងពានរង្វាន់ Africa Cup of Nations ឆ្នាំ២០២៣ ដោយពួកគេបានចោទប្រកាន់ពីអំពើពុករលួយ និងការចំណាយខ្ជះខ្ជាយរបស់សហព័ន្ធក្នុងអំឡុងពេលការប្រកួត។ ពួកគេក៏បានអំពាវនាវឱ្យមានគោលនយោបាយកីឡាបាល់ទាត់ជាតិ បង្កើនការវិនិយោគលើវិស័យបាល់ទាត់ថ្នាល និងការកែលម្អលីគបាល់ទាត់ក្នុងស្រុកផងដែរ។

គួរបញ្ជាក់ថា បច្ចុប្បន្ននេះសមាគមបាល់ទាត់ហ្គាណា ដែលដឹកនាំដោយលោក Kurt Okraku កំពុងសម្លឹងរកគ្រូបង្វឹកថ្មីមួយរូបទៀត ដែលជាគ្រូបង្វឹកទី៥ហើយ គិតត្រឹមរយៈពេល ៥ឆ្នាំចុងក្រោយ៕